LaoForum ລາວໂຟຣາມ ເວບໄຊເພື່ອຄົນລາວ

ກະແສຂ່າວ ທ້ອງຖິ່ນ ຣາຍງານວ່າ ຕໍາຮວດ ແຂວງ ຮ້ອຍເອັດ, ພາຍຫລັງໄດ້ຮັບຂ່າວ ຈາກ ຊາວບ້ານວ່າ ມີຄົນ ແປກໜ້າ ເຂົ້າມານອນ ຢູ່ຕາມທົ່ງນາ ປ່າຮົກ ໃນເຂດ ບ້ານ ໂນນສະຫວັນ ກັບ ບ້ານ ໂນນແທ່ນ ຈຶ່ງໄດ້ ໄປກວດສອບ ແລະ ພົບຊາວລາວ 81 ຄົນ, ເປັນຊາຍ 35 ຄົນ ແລະ ຍີງ 46 ຄົນ. ຈາກ ການສອບຖາມ ຊາບວ່າ ມີນາຍໜ້າ ໄປຮັບ ທີ່ເມືອງ ເຂັມມະຮາດ ແຂວງ ອຸບົນຮາຊທານີ, ບອກວ່າຈະພາໄປ ທໍາງານ ທີ່ບາງກອກ. ແຕ່ລະຄົນ ເສັຽເງິນ ໃຫ້ນາຍໜ້າ ຣະຫວ່າງ 2,500 ບາດ ຫາ 2,700 ບາດ.  ຈາກນັ້ນ ກໍພາ ຂຶ້ນຣົດ ກະບະ 3 ຄັນ ໄປ ຈົນຮອດ ກາງຄືນ. ພາມາ ປ່ອຍໄວ້ ກາງທົ່ງນາ ໂດຍບອກ ໃຫ້ຊອກ ບ່ອນລີ້ຊ່ອນເພາະ ທາງຕໍາຣວດ ຕາມຈັບ ແລະ ເມື່ອປອດໄພແລ້ວ ຈະມາຮັບ. ແຕ່ຖ້າ ຈົນຮອດຕອນບ່າຍ ຂອງມື້ໃໝ່ ກໍບໍ່ເຫັນ ມາຮັບເລີຍ. ແລະ ຍ້ອນຫິວເຂົ້າ ຫີວນໍ້າ ຈຶ່ງພາກັນອອກໄປ ຂໍເຂົ້າຂໍນໍ້າ ນໍາຄູບາ ຢູ່ວັດ ແລະ ຊາວບ້ານ. ທາງເຈົ້າໜ້າທີ່ ຕໍາຣວດ ຈຶ່ງເອົາເຂົ້າ ແລະ ຕໍາໝາກ ຮຸ່ງມາລ້ຽງ ແລ້ວກໍເອົາຕົວໄປ.

ແລະ ໃນມື້ດຽວກັນນີ້, ຢູ່ເຂດ ເມືອງເຂັມມະຣາດ ຕໍາຣວດ, ຫລັງຈາກ ໄດ້ຮັບຣາຍ ງານ ຈາກຊາວບ້ານ ວ່າ ພົບຄົນ ຫລາຍຄົນ ຢູ່ທີ່ປ່າຮົກ ໄກ້ທາງຫລວງ ແລະ ໝູ່ບ້ານ ຈຶ່ງໄປ ກວດກາເບີ່ງ. ພົບຊາວລາວ ຈໍານວນ 22 ຄົນ ເປັນຊາຍ 12, ຍີງ 10 ຄົນ. ຈາກການສອບຖາມ ຊາບວ່າ ທັງໝົດ ມາຈາກ ເມືອງສອງຄອນ ແຂວງສະຫວັນນະເຂດ, ລັກລອບ ເຂົ້າເມືອງໄທ ເພື່ອໄປ ຊອກເຮັດວຽກ ໃນບາງກອກ.

ນອກຈາກນີ້ ຕໍາຣວດ ແຂວງ ນະຄອນ ຣາຊສີມາ ກໍກວດພົບ ຣົດຕູ້ ຄັນນຶ່ງ ທີ່ບັນທຸກ ຊາວລາວ ທັງໝົດ 14 ຄົນ, ຊຶ່ງຜູ້ຂັບ ສາຣະພາບວ່າ ໄດ້ຮັບຈ້າງ ນໍາຄົນລາວ ທີ່ລັກລອບ ເຂົ້າເມືອງໄທ ຜ່ານ ທາງນະຄອນພະນົມ ໃຫ້ໄປສົ່ງ ທີ່ບາງກອກ. 

ທັງໝົດ ຖືກນໍາຕົວ ໄປດໍາເນີນຄະດີ ຕາມກົດໝາຍ ຂອງໄທ ເພື່ອຜັກດັນ ກັບຄືນປະເທດລາວ.

From RFA.org